Gipuzkoako Foru Aldundiko Diputatuen Kontseiluak “basoak mantentzeko, hobetzeko eta garatzeko” diru-laguntzen deialdia onartu du otsailaren 24an: 3.907.500 euroko zuzkidura izango du. Laguntzak jarduera-ildo desberdinetan egituratzen dira.
Horien artean, honako hauek nabarmentzen dira: basogintzara eta baso-azalerak sortzera bideratutakoak: 1,3 milioi euro; onddo-gaixotasunek eragindako zuhaitzen mozketa: 600.000 euro; eta suteek eta hondamendi naturalek eragindako kalteen prebentzioa: 500.000 euro.
Horrez gain, Foru Aldundiak landa bideak eraikitzea eta konpontzea bultzatuko du, guztira 1.300.000 euroko zuzkidura onartu du; eta lurraldeko udalei eta toki-erakunde txikiei zuzenduko zaizkie laguntza hauek.
Era berean, Aldundiak azaldu du 800.000 eurorekin lagunduko dituela Gipuzkoako landa ingurunearen garapen ekonomiko eta sozialean laguntzen duten ekimen kolektiboak.
Baso Kudeaketa Jasangarria sustatzeko
Baso dirulanguntzen inguruan, Irune Berasaluze foru bozeramaileak zera esan du: “Mendiek onura ugari sortzen dituzte lehengai berriztagarria ematen dutelako eta jarduera ekonomikoari laguntzen diotelako, eta, aldi berean, biodibertsitatea zaintzen dute eta funtsezko zeregina betetzen dute karbonoaren zikloan, oreka hidrologikoan, higaduraren kontrolean eta suteen eta arrisku naturalen prebentzioan”.
Aldundiak komunikatu batean esan duenez, deialdi honen helburua, Gipuzkoako basogintza sektorearen erronka nagusiei erantzutea da: “sektorea gaztetzea eta profesionalizatzea, kudeaketa uztearen aurka egitea, sarbideen hobekuntza, suteen prebentzioa, gaixotasunen aurreko erantzuna, kalitatezko lehengai berriztagarria lortzea eta biodibertsitateari eustea”.
Foru Gobernuak esan du “basogintza sektoreak garrantzi ekonomiko, ingurumeneko eta sozial eztabaidaezina” dela, eta Aldundiaren helburua dela “horri laguntzea, denboran kudeaketa jasangarria eta bideragarria bermatzeko”.